انتو عندكو فيدرير .. واحنا عندنا دروبني

وانت بتقلب في قائمة الفائزين بويمبلدون ما تستغربش لو لقيت علم مصر.. أيوة فيه لاعب مصري فاز بويمبلدون سنة 1954..

ياروسلاف دروبني .. [قل لي بقى إنك ما تعرفش عيلة دروبني بتوع دمياط!] .. الحقيقة إنه تقريباً ما عاشّ ف مصر خالص .. أصله تشيكوسلوفاكي، وتجنس بالجنسية المصرية، ولعب كمواطن مصري لمدة 9 سنين تقريباً.

طب وإيه الحلو ف مصر عشان واحد تشيكي يتجنس بجنسيتها؟ وبطل رياضي كمان؟!..

سنة 1950 حصل انقلاب في تشيكوسلوفاكيا، وكان ياروسلاف وغيره من الأبطال الرياضيين بيُستغلوا للدعاية للنظام -"الانقلابي"- الشيوعي الجديد. الراجل طق منهم وقرر يسيب البلد.. قدم على جنسية ف أكتر من دولة، ومصر وافقت تجنسه .. راح لعب ويمبلدون وفاز بيها باسم مصر ... :-)

على سنة 1960 كان أخد الجنسية البريطانية وعاش هناك ..

النهاردة ذكرى وفاة ياروسلاف دروبني .. الراجل اللي رفع علم مصر ف ويمبلدون ..

وبكدة يبقى مصر دروبني زي سويسرا فيدرير وكرواتيا إيفانيزيفيتش .. دولة ليها بطل واحد فاز بويمبلدون!

هلاّ منشنتم عادل الشطي وكريم العلمي وفخر الدين السنهوري :-)