تمويل أجنبي؟؟ طب تعال بقى

دخلنا دلوقتي في نغمة الطعن في شرعية وأهلية بعض الائتلافات الثورية بحجة التمويل الخارجي. كان ممكن الكلام يمر عادي زي ما بيمر كلام سخيف من ناس أسخف لحد ما لقيت أصوات إسلامية بتلك في الموضوع.

كون أي حد يتلبش ويكش من كلمة التمويل الأجنبي فديه حقيقة. طيب هو يعني إيه تمويل أجنبي لأول؟ بالنسبة لي: هو إن جهة أجنبية تمول جهة محلية بهدف سياسي. إصلاحي، تخريبي، تصدير عنف، تصدير فوضى، تصدير فكر... كلها رسائل سياسية. وهنا السؤال: هل فيه تمويل خالي من المضمون السياسي؟؟ في اعتقادي لأ... لأن الـ "لا موقف" في السياسة هو موقف بحد ذاته.

نتكلم في التفاصيل... عابوا على بعض الائتلافات -إن صحت المزاعم- إنهم تلقوا تمويل من الغرب عموماً ومن أمريكا خصوصاً. طيب إيه أخبار دعم نظام الأسد ونظام القذافي للأحزاب الناصرية؟؟ تمويل أجنبي ولا مش أجنبي؟؟ وجماعة الإخوان المسلمين ببعدها الدولي، صعب تنفي وجود التبرعات الخارجية.. خصوصاً إن فيه أعضاء معروفين أو على الأقل متعاطفين عايشين برة مصر، وكمان في أوروبا. والسلفيين؟؟؟ حد يقدر ينفي الدعم الخليجي لسلفيين في مصر؟

المشكلة إن الإسلاميين هم أقل طرف اهتماماً بمصادر تمويلهم .. بمعنى إنهم بيطلبوا تبرعات لخدمة الدين والدعوة .. إلخ، وما عندهمش مشكلة في تبرعات تجيلهم من الخارج. والدعم بيبقى أحياناً على هيئة إنفاق على الدعوة وإنشاء مساجد بجمعياتها وإنشاء معاهد دينية ودعم القنوات الدينية... إلخ. وده ما يعتبرش تمويل خارجي ذو توجه سياسي؟؟ خصوصاً إننا شبه متأكدين إن دول الخليج وخصوصاً السعودية والكويت هم أكتر مناطق العالم دعماً للقوى المضادة للثورة .. يبقى أنا كمصري لسة فيّ روح الثورة هابص للتمويل الخليجي بريبة شديدة. وهنا السؤال: إيه دخل الإنفاق على الدعوة والمعاهد والمساجد بالسياسة؟ أقول لك ... هي مش الدعوة هي البوابة الكبيرة لزيادة شعبية الإسلاميين؟ وشعبية كبيرة يعني أصوات كتير؟ يعني انتخابات نكسب... يبقى سياسة ولا مش سياسة؟؟

يبقى إذاً الدعم الخارجي أو التمويل مش السبة الفظيعة اللي بيها تجرح وتشرح خلق الله. طب ما حماس مدعومة من سوريا وإيران والتبرعات الشعبية العربية.. إذاً حماس خونة مثلاً؟؟

وكلامي ده لا يعني إن فيه تمويل مشبوه ريحته معفنة.. لكن مش كل تمويل أجنبي يبقى صاحبه خاين وعميل ونشنع عليه. ده غير أن التمويل الغربي مش سر أساساً.. ده بيبقى معلن من الحكومات قصاد مجالسهم النيابية اللي بتراقب صرفهم لأموال الضرائب.

هل نمنع التمويل الأجنبي بكافة أشكاله مالم يكن من جهات عالمية زي الأمم المتحدة وبرنامج الغذاء ومنظمة التعاون الإسلامي؟؟ طب لو اتمنع بالكامل هل ده هايضر مصالح إسلامية دعوية أحب إنها تفضل شغالة؟ طيب لو استغلت سياسياً بشكل غير نزيه؟؟ مش عارف. من ناحية بارفض التمويل الأجنبي عموماً ومن ناحية خايف إنه يكون في السماح بيه مصلحة الدعوة إلى الله... فعلاً محتار، لكن اللي متأكد منه إن اللي أسمح بيه لنفسي مش هامنعه عن غيري.

يحل الإشكال ده كله توافر رؤوس أموال محلية كفيلة بتدبير نفسها بدون الاحتياج إلى الخارج.

افتكاسات دية قتل المتظاهرين

أنا مش فقيه ولا بادعي الفقه .. لكن عندي كلام أوجهه للإخوة اللي شغالين في موضوع دية قتل المتظاهرين.

مش هاطعن في الدية وحكمها ومشروعيتها وفقهها. لكن أفكركم إن الفقه مش مجرد تطبيق جامد للنصوص وخلاص .. فيه حاجة اسمها فقه الواقع... فيه حاجة اسمها مفهومية الفقيه لا مؤاخذة!

فاكرين ابن عباس لما سئل عن توبة قاتل النفس وقال إن مالوش؟ .. علشان مايديش قاتل تصريح بالقتل ثم التوبة.

فاكرين قصة الأمير اللي سأل عالم عن كفارة اليمين فقال له صيام 3 أيام.. رغم إن الأصل في الكفارة إطعام 10 مساكين.. علشان العالم عارف إن الأمير ولا يفرق معاه إطعام 100 مسكين .. فتبقى الكفارة اللي تردعه هي الصيام مش الإطعام.

احنا كلنا عارفين أد إيه اللي قتلوا المتظاهرين مجرمين .. شوفوا الإصابات اللي في الرأس أد إيه؟؟ .. يعني كان الضرب بغرض القتل.

وعارفين أد إيه اللي أجرم وقتل الناس بالوحشية دي في الشوارع وهم عزل مظلومين نفسه ف أي مخرج وخلاص... فيبقى آجي أنا دلوقتي وأقول له ادفع فلوس وخد براءة؟؟؟ ... يعني يقتل اخواتنا وولادنا ويرميلنا قرشين وبراءة يا باشا .... يعني يقتلنا ويرجع تاني يركبنا: بفلوسي يا كلاب!!!!

ثوري وطني

حتى أكون واضحاً -مع نفسي قبل أي أحد. ما أدعمه وأتبناه الآن هو التوجه الثوري الوطني، وهو ما أراه أقرب للمصلحة من وجهة نظري الشخصية. الثوري الذي لا يقبل بالحلول الوسط.. من محاولات خسيسة ليفلت من العقاب الجناة، الذين لم يتورعوا عن امتهان الشعب على مدى أكثر من نصف قرن، وحتى الذين تجرأوا على أسيادهم/الشعب وقتلوهم في الشوارع.. عزل.. مظلومين.. مطالبين بالحق والعدل والكرامة. الخيار الثوري الذي لا يرضى بغير ما قتل الناس من أجله كاملاً غير منقوص. الثوري الذي لا مشكلة لديه أن يثور مرات ومرات إن حدث وعبثت السلطة الحاكمة بما ثار من أجله معرضاً نفسه للرصاص والسجن.

م الآخر وبالعربي: ثوري يعني اللي يتكسف من السلطة ما يجيبش منها حقوق!!

أما أنه خيار وطني: فكما قالوا بالضد تعرف الأشياء. الوطني الذي أعنيه الذي هو ضد الفئوية السياسية. يصفون بعض الاحتجاجات بالفئوية لأنها لا تعني إلا فئة محددة من الناس. توصف بالفئوية بغرض الذم -بالرغم من مشروعيتها إنسانياً على الأقل. فكما أن هناك تلك الفئوية الاقتصادية/الاجتماعية، فهناك الفئوية السياسية التي تظهر في بذل الجهد والحرص لتحقيق مكاسب تخص فئة ما -مهما بدت المكاسب مشروعة ووطنية- لكنها في النهاية تخص فكر قوة أو جماعة سياسية بعينها. فمن هذه الجهة أصمها بالفئوية السياسية. المرحلة العظيمة التي نعيشها بلدي الآن توجب عليّ أن أترفع عن أجندتي وخطة طريقي الخاصة بفئتي إلى ما فيه مصلحة الجميع.

ويبقى التوجه الثوري طالما بقيت مطالب لم تتحقق.

وتبقى الـ"لا فئوية سياسية" حتى تسلم السلطة لممثلين عن الشعب منتخبين بنزاهة ولا ينقلب عليهم الجيش.