فاكرك

في المسجد قابلني ..

وقال لي يا ترى فاكرني ؟

قلت فاكرك ...

وف كل جرس باب بافتكرك ..!!

وبافتكرك ..

في كل تكتكة قلم على مكتب !!

ولما تقف التكتكة :

أفضل مستني ...

قلم على وشي ..

واستنى الخرزانة ..

واستنى الدم يشلب من كل حتة ف جسمي ..!

فاكرك ..

فاكر صوت جنازيرك ..

.. منظر ورق تقاريرك ...

.. رنة ضحكة خنازيرك ..

وبافتكرك ...

في كلاحة وش المخبرين ..

في كل سارينة .. كل بوكس !!

وف كل مرة يخرم وداني سب دين !!

بافتكرك .. بافتكر ...

كل اللي اسود واللي اتسم جوايا ..!

وكل اللي جيتلك بيه ...

ومشيت ومش معايا !

والعمر بين اللحظتين فاكره ..

عمر غالي .. كما الدم !

عمر مُر .. كما الهم !

قبل ماشوفك .. مش فاكر كنت إيه !

بس بيقولوا إني كنت عادي :

كنت باشوف وباحلم ..

وبحسّ .. واندم ..!

بيقولوا إني كنت بافكّر !

أما دلوقتي ..

فأنا بس باضحك واكشر !!

بافتكرك بافتكر ريس ومرؤوس .!!

واقول لم شمالي منجل ...

يحشّ الروس !

وبيميني أحرر فكر محبوس :

محبوس بين الحلم والوهم والكابوس !

جهاز 50

6.6.2007