مـــيـــن فـــيـــنـــا لــــم يــــخــــاف

!! عَــوْ عَــوْ عَــوْ
! لسة نازل تَـوْ
!!! جاي للدنيا السَــوْ

،... مين فينا لم يخاف بُعد أمه
!لم يخاف الجوع والبرد ؟
،... مين لم يخاف الضلمة والوحدة
!والبلل والوقوع ع الأرض ؟
... ومين لم يخاف من النملة والعنكبوت
!وأوضة الفيران ؟
... ومين لم يخاف من قطة السلم لما تولد
!وكلب الجيران ؟

... اللي ما خافش
... أصلاً ما اتولدش
!! ما اتخلقش

.. ونكبر ويكبر معانا الخوف
! زي ما كبر الشوف
... ويفضل في قلوبنا أثر
:... للخوف الصغنطوط
!! الخوف م الضلمة والعنكبوت

... مين لم يخاف يتمسك
!بيبصبص لجارة ؟
!أو مزوّغ أو مولع سيجارة ؟
... مين لم يخاف من جواب
!استدعا لأهله م الإدارة ؟
!مين لم يخاف الامتحان والسقوط ؟
!مين لم يخاف على مستقبله ؟
... على شكله .. مظهره
!أو إن الناس لا تقبله ؟

... واللي ما خافش
... أصلاً ما اتولدش
!! ما اتخلقش

.. ونكبر ويكبر معانا الخوف
! زي ما كبر الشوف
... ويفضل في قلوبنا أثر
... ما يندمل للخوف
!! الخوف م الفضيحة والفشل

... مين لم يخاف القعدة ف البيت
!!أو الرمية ف الجيش ؟
... مين لم يخاف العيا والهم
!!وقرارات الطيش ؟

!!مين لم يخاف الخوف ؟؟
!!مين لم يخاف الخوف ؟؟
!!مين لم يخاف الخوف ؟؟

.. ونكبر ويكبر معانا الخوف
!زي ما كبر الشوف
!لحد امتى يا خال ؟
... لما تسمع لسان الحال
... بيخاطب خوفك
: الصغنطوط
!! حياتك خلصت .. بَح"
"!! بس انت ما خفتش صح