لحد امبارح بالليل كان صوتي لـ د. مصطفى النجار وكنت باقول إن لو د. محمد يسري هو اللي كسب فأنا قطعاً مش خسران .. يعني كنت باختار بين جيد وأفضل .. لأن كل واحد فيهم فيه صفات مش ف التاني، وبالتالي فدايرة مدينة نصر كدة كدة كسبانة. ولحد دلوقتي باقول إن الدايرة كدة كدة كسبانة لأننا بفضل الله سقطنا الفلول.. وكل اللي بيعيدوا ع الأقل مش فلول.
كان ده موقفي لحد ما عرفت موضوع المنشور اللي انتشر عن مسالة "نصرة" الإسلام و"دعم الكنيسة" للنجار، المنسوب لحملة د. يسري. لو مش هاتشوف الفيديوهات ذات الصلة.. الموضوع وما فيه إن فيه منشور انتشر بيدعو الناس للتصويت للشيخ لنصرة الدين ضد النجار المدعوم من الكنيسة.. اللي فتح الموضوع كان د. النجار في مداخلة مع برنامج، وبعدين د. يسري اتصل وكذب الادعاء بإن له صلة بالمنشور وكذب إنه يكون اتنشر على صفحته. لحد هنا والموضوع عادي.. واحد ادعى ادعاء والطرف التاني داغع عن نفسه وكذب. لكن اللي حصل بعد كدة د. النجار اتصل ببرامج تانية واتكلم بنفس الكلام اللي الشيخ رد عليه. يعني الكلام كذب وهو مستمر في ترديده.. وبرضه الشيخ رد عليه وقال له إن هو رد ع الكلام ده قبل كدة. وأنا بمعرفتي للشيخ أقول إنه مستحيل ينزل للمستوى ده من الدعاية.
يعني باختصار.. بغض النظر عن توجهاتنا ومرجعياتنا؛ احنا قدام حالة أخلاقية! واحد ادعى إدعاء على واحد .. والمدعى عليه دافع عن نفسه وبرأ نفسه، بالرغم من إن المدعي كان ينبغي إنه يقدم بينة، بإنه مثلاً يجيب صورة لصفحة الشيخ وفيها المنشور ده (البينة على من ادعى). وبعدين لما يستمر في ترويج نفس الكذب -المردود عليه- يبقى إيه؟؟؟
موقف: لأني باقدم الأخلاقي على الأيديولوجي .. والنزاهة على المكسب ... فأنا لو كنت ف موجود ف الإعادة هاصوت للـ د. محمد يسري.. وبادعو اللي مهتم برأيي إنه يعمل كدة. وده موقف أخلاقي مالوش علاقة بالتوجه أو المرجعية.
كلمة أخيرة لمؤيدي الـ د. محمد يسري: لو سمعتم كلام الشيخ كويس هاتلاقوا إنه تبرأ من استخدام دعاية طائفية واعتبرها أسلوب غير شريف في المنافسة.. فأرجوكم كفاية ترديد لما تبرأ من الشيخ علناً.
No comments:
Post a Comment