بس هي مش مذبحة..ـ

تيجو نصدق الأرقام الرسمية لـ"فض" اعتصام رابعة؟

وزارة الصحة: 847 قتيل، منهم 43 فرد أمن.

وزير الداخلية: عدد المعتصمين 15000 معتصم. وفض الاعتصام كان طبقاً للمعايير الدولية.

وزير الدفاع: كان فيه 20، 30، 50 مسلح.

آمين يا عم، أنا مصدق..

المعايير الدولية اللي اتكلم عنها وزير الداخلية عن فض الاعتصام اللي يُدَرّس، بتقول إن اللجوء للأسلحة القاتلة يكون للدفاع عن النفس وبالقدر الذي يدفع به الفرد في القوات النظامية خطر الموت عن نفسه.

إذاً نفهم من كلام وزارة الصحة إن كان فيه أكتر من 800 مسلح يشكلون خطراً على أفراد الأمن! .. انت متخيل يعني إيه 800 مسلح؟ يعني كتيبة سعادتك! .. إذاً كان فيه كتيبة كاملة مسلحة ف رابعة!.. يعني معتصم من كل 6 معتصمين كان شايل سلاح! انت متخيل كم الدمار اللي ممكن يمارسه 800 مقاتل؟

وقتلت كام يا عم الكتيبة دي؟ 43؟ واااو .. وماله!

ونفهم من كلام وزير الدفاع إن المسلحين مش 800 .. دول كانوا 20، 30، 50.. .. يعني كانت نسبة التسليح من [مسلح لكل 299 أعزل] إلى [مسلح لكل 750 أعزل] ..

طبعاً إحنا لو شفنا تجمع فيه 300 بني آدم ومعاهم حتة سلاح واحدة، هنقول بلا تردد إن التجمع ده مسلح!.. أومال!

يعني الداخلية "تعاملت" مع المسلحين الـ 20 أو 50 بقتل 800.. عارف يعني إيه؟ -من غير ما تطلع الآلة الحاسبة-.. يعني واحد مسلح مقاتل يموت قصاده 15 أعزل! ... أو واحد مسلح قصاد 39 أعزل.. يبقى كدة الداخلية لما قررت تنفذ فض اعتصام يدرس قتلت من 780 لـ750 أعزل عشان تصطاد من 20 إلى 50 مسلح مقاتل ... انت لو بتلعب جيم وكانت نسبة الدقة ف تنشينك 6% الكومبيوتر هيسبلك الملّة!

القتل استمر لمدة 10 ساعات... يعني كان معدل قتل المعتصمين 80 قتيل في الساعة.. قتيل كل 45 ثانية لمدة 10 ساعات! .. انت متخيل؟

بس هي مش مذبحة! .. ريح ضميرك وقول له دول كانوا مسلحين وهي مش مذبحة!

ملحوظة: اتكلمنا ع الأرقام.. وما جيبناش سيرة نوعية الأسلحة وطريقة استخدامها .. ولا عن المسدس الفتاك ده اللي يعمل ف الراس فتحة بقطر 10 سم، ده لو الراس فضلت موجودة أصلاً .. ولا عن حرق الجثث .. ولا عن مأساة المشرحة.. الأرقام الرسمية بس كفاية!